De Polizei kickt op de Hamborger Mai-Demos vun güstern positiv op trüch. Denn bi de Demos harr dat kuum Twüschenfäll bi geven. Üm un bi 6.000 Lüüd hebbt, de Polizei na to uurdelen, an de Kundgevens vun den Düütschen Warkschopbund an deelnahmen. De DGB snack vun 9.000 Lüüd. De Warkschop verlang blangen anner Saken, apentliche Opdrääg schullen blots noch an Firmen vergeven warrn, de Tarifverdrääg harrn. Un bi dree Demos vun de linke Szeen hebbt düütlich mehr as 10.000 Lüüd an deelnahmen. Een dorvun stünn ünner dat Motto „Gegen en Stadt vun de Rieken“ un dor güng dat de Lüüd üm Wahnruum, den een betahlen kunn.
In Rahlsteed hett sik güstern Middag en Autokutscher en Verfolgensjagd mit’e Polizei levert. En 23 Johr ole Keerl is mit en Car-Sharing-Auto vör en Verkehrskontroll flücht un deswegen eenmal verdweer dör Rahlsteed raast un dorbi denn ok dör en Footgängerzoon. Bi to Schaden kamen is nüms. In dat Naturschuulrebeet Höltigboom hett de Keerl denn de Kontroll över sien Auto verloren un kööm dormit denn op’e Siet to liggen. Denn is he to Foot utneiht. Kort dorna aver hett em de Polizei faatkregen un fastnahmen. Gegen em warrt nu blangen anner Saken wegen Föhren ahn Föhrerschien un dat Föhren ünner Influss vun Drogen vörgahn.
In den Hannelsstriet mit de USA hett de EU nu en Anbott op’n Disch leggt. So as de „Financial Times“ dat schrieven deit, slöög de Europää’sche Union för, se wullen för 50 Milliarden Euro mehr wat an amerikaan’sche Saken köpen. Blangen annern Kraams weer dat Flüssiggas un welk Agrarprodukten. In den Bericht steiht aver ok binnen, dat de EU op’e annere Siet verlangt, de Straaftöll schullen dorför wegfallen.
Eerst güstern de Fierdag, af morgen denn dat Wekenenn un deswegen sünd vundaag, an’n Brückendag, ok sünnerlich veel Touristenlüüd in Hamborg ünnerwegens. Dor freiht sik ok de Hotelbrangsch över. Düsse Week liggt de Utlasten vun’e Hotels bi üm un bi 85 Perzent. Dat wiest de Tahlen vun Hamborg Tourismus. Un nu in’n Mai is denn ok düt Johr wedder de Havenboortsdag un de treckt üm un bi annerthalf Millionen Besökers an. Un liekers Hamborg al vele Hotels hett, schüllt bet Enn vun’t Johr noch söss Hotels bavento kamen. Dree dorvun sünd in dat Westfield Inkoopscenter.
Af vundaag kummt in Hamborg noch en grote Bosteed bavento. Denn an’e Elvbrüchen gaht vundaag de Boarbeiden los. Un dat Trechmaken dor, dat schall bet Enn vun’n Oktobermaand duern. Twüschen Veddel un Rodenborgsoort mööt na de Stadt rin welk Steden vun’e Fohrbahn instandsett warrn. Deswegen mööt de Autos dor denn ok ’n beten wat anners föhren un een Fohrbahn un de Utfohrt na de Havencity hen sünd denn beide ganz un gor dicht. Deswegen mutt een, wenn een na de Stadt rinföhren deit, ok eerstmal mit Staus reken.
För de beiden Hamborger Footballclubs kann sik düt Wekenenn al veel wat wiesen, woans dat för jüm wiedergahn deit. Denn de FC St. Pauli mutt morgen gegen Stuttgart ran. Un bi jüm geiht dat dorüm, dat se villicht nu al weet, wat se in jümehr Klass blieven köönt. Deswegen drückt se ok de Duums, dat Heidenheim vundaag gegen Bochum Punkten liggenlaten deit. Denn in den Fall kunnen se dat denn morgen tohuus gegen den Pokaal-Finalisten VfB Stuttgart kloormaken, dat se in’e Eersten Liga blieven doot. Un bi’n HSV geiht dat üm den Opstieg. De HSV hett dreemal slecht speelt un will morgen in Darmstadt nu aver endlich wedder punkten.
Blangen vele Wulken kriegt wi vundaag aver ok ’n beten wat de Sünn to sehn. Na’n Middag hen un an’n Namiddag kunn dat hier un dor ok’n beten wat regen. Verenkelt kann dat ok gewiddern, tominnst is dat nich ganz utslaten. De Temperaturen liegt vundaag so bi üm un bi 23 Graad. De Wind kann stedenwies ok ’n beten wat duller warrn. In’e Nacht geiht dat denn wedder rünner op bet to söss Graad. Un morgen warrt dat denn nich mehr as 17 Graad. Dorför kriegt wi aver ’n Tick mehr wat an Sünn un weniger Regen as vundaag.
